Промоција во Гостивар – Кипроски испиша историски момент во македонското новинарство

Педесет и две годишното новинарско искуство на доајенот на македонското новинарство Киро Кипроски е крунисана во монографијата „Поглед низ времето“, која денес беше промовирана во Гостивар.

Во над 520 страници, со околу 200 новинарски текстови оживеани се записи, репортажи, оригинални стории и фотографии – сведоци на настани и случувања, не само за гостиварскиот крај туку и пошироко.

„Станува збор за историски момент и чин во македонското новинарство, затоа што ваква книга со еден ваков опфат на теми и посветеност, до сега немало. Овие текстови на Кипроски времето не ги победило, овие материјали може и сега да се читаат како современи записи на разни теми, почнувајќи од репортерски записи од Македонија и странство, спорт, култура…Оваа книга ќе остане втемелена во историјата на македонското новинарство, ќе биде инспирација и можеби извор на нови истражувања за новинарите да се навраќаат на некои теми кои во неа се обработени. Мислам дека Киро дава придонес не само во историјата на макеодонското новинарство, туку и воопшто во историјата наМакедонија, нешто што ќе остане забележано за следните генерации.“, нагласи промоторот Блаже Миневски, новинар и публицист, долгогодишен колега на Кипроски.

Книгата е подготвувана во период од една година и авторот вели дека не било лесно да се издвојат текстовите што ќе влезат меѓу кориците на ова дело, со оглед дека има опус од над 2.000 новинарски записи, поткрепени со автентични фотографии. Денот на промоцијата го доживува како круна на сработеното.

„Се чувствувам прекрасно, ова е убав ден за мене. Откако ја најавив промоцијата на оваа моја 10-та монографија, преку 300 колеги ми се јавија, ме исконтактираа да ми честитаат, еве сега промоцијата поминува со големо внимание и тоа е најголемо признание за еден автор. Сакам на сите, од срце да им се заблагодарам“, рече Кипроски.

За новинарскиот труд и новото дело на доајенот на македонското новинарство, на промоцијата зборуваше и проф. д-р Светлана Велјаноска. „Киро е еден од малкуте новинари кои истовремено оставиле белег и во печатените и во електронските медиуми и во радиото, а исто така и во фоторепортерството. Читајќи ја монографијата, може да се види дека не е ограничен само на Гостивар туку пишува и за Галичник, особено внимание дава на Галичката свадба, на Бигорскиот Манастир, има впечатливи интервјуа со Радован Павловски, Томе Серафимовски, пишува за нобеловецот Ферид Мурад. Неговите репортажи за Тунис, Ангора, Кина се привлечни за читање и ја потврдуваат вредноста на неговата повеќедецениска новинарска и фоторепортерска кариера која се уште трае’, подвлече Велјаноска.

Промоцијата на „Поглед низ времето“ во Гостивар беше збогатена со музички настап на триото „Кладенец“.