Промовиран краткиот филм за предизвиците на Јосиф од гостиварско Тумчевиште

„Овој краткометражен филм од околу 8 минути, ги прикажува моите 28 години живот. Живот полн со предизвици, а не како живот кој значи темнина, срам и криење. Живот во кој со леснотија ги надминувам предизвиците, затоа што и ги очекувам“, рече на денешната промоција на краткиот филм, по повод месецот на ихтиозата, Јосиф Мишевски од гостиварско Тумчевиште, кој се соочува со оваа ретка болест.

Пред присутните на настанот се обрати и Весна Алексовска, претседател на здружението на граѓани со ретки болести „Живот со Предизвици“. „Јосиф го запознав пред неколку години и ми беше мило што има толку надеж и позитивна енергија, со желба да помогне, не само да бара помош. Ретките семејства се такви, секој подава рака на другиот, затоа што знаеме колку боли“, рече Алексовска.

Како поддршка за Јосиф на промоцијата беше и малата Ива Петревска од Гостивар, која исто така е пациент со ретка болест.

Промоцијата се одржа во Coffee Club PEOPLE  во Гостивар, а филмот е создаден со поддршка на Про Кам студио.