„Промовирање слобода на медиумите, значи залагање за правото на вистина“

Денес во светот се одбележува 3-ти мај, Меѓународен ден на слободата на медиумите. Одлуката за негово прогласување е донесена од Генералното собрание на Обединетите Нации во 1993 година, како резултат на генералната конференција на УНЕСКО, две години порано. Во резолуцијата на конференцијата се наведува дека независниот печат е основен елемент на секое демократско општество. Целта е да се даде значење на улогата на медиумите во градењето на мирно и праведно општество, да се дебатира околу слободите на новинарското изразување и да се потсети на принципите на новинарството.

Генералниот секретар на ОН, Антонио Гутереш во својата порака по повод 3-ти мај вели: „Промовирањето слобода на медиумите, значи залагање за правото на вистина. На Светскиот ден на медиумите ги повикувам Владите да ја зајакнат слободата на медиумите и да ги заштитат новинарите“.