Пронајдени пушка, пиштол, мобилни телефони при претрес во работилница во Гостивар – Приведени две лица

Две лица биле приведени вчера во Гостивар под сомнение за извршени повеќе кражби. Како што информира МВР, врз основа на судска наредба, полициски службеници извршиле претрес во работилница на улица „18 Ноември“ во Гостивар, сопственост на 68 годишен гостиварец. Во работилницата бил затекнат 30 годишниот Р.К. од Албанија, кој бил лишен од слобода поради постоење основи на сомение за  извршени повеќе кривични дела кражба и поседување огнено оружје, како и други кривични дела.

„При претресот биле пронајдени една автоматска пушка без рамка, една рамка за автоматска пушка со 24 куршуми калибар  7.62 мм, една рамка за пиштол со четири куршуми, еден пиштол без рамка, како и други предмети за кои постои сомнение дека потекнуваат од кривично дело „кражба“ и тоа: девет мобилни телефони, две дигитални камери, осум рачни часовници, бижутерија и други предмети. Сите пронајдени предмети биле одземени и дадени на вештачење“, соопшти МВР.

Поради сомнение дека заедно со Р.К. ги извршувал кражбите, во Полициската станица Гостивар бил приведен и 26 годишниот И.А. од Гостивар.