Роботот „Здравко“ од Жировница освои 3.000 евра и прво место на иновациски предизвик

Креативноста и вложените труд и време на учениците и наставниците од основното училиште „Јосип Броз Тито“ во Жировница се крунисани со успех. На иновациски предизвик за основните училишта на тема „Изум кој ќе го направи светот подобро место за живеење“ што го организираше НЛБ банка, нивната макета на паметен робот го освои првото место и награда од 3.000 евра.

Роботот се вика Здравко, а името е избрано затоа што асоцира на здравје и здрава животна средина. Идејата е Здравко да може да собира, рециклира и да чисти отпад. Направен е генерално од стара хартија, има посебни кутивчиња за селекција на отпад во различни бои и украси што му даваат пријателски лик.

„Го видовме конкурсот за иновациски предизвик и решивме да се пријавиме. Идејата за паметен робот беше на наставниците, а во изработката учествуваа децата од целото училиште. Секој имаше своја задача и даде свој придонес. Целиот процес на создавање на Здравко траеше само 6 дена, значи имавме интензивна и посветена работа“, рече Рамазан Раманоски, наставник по македонски јазик.

За учениците доживувањето да учествуваат во правење на робот било интересна, поучна и многу забавна активност. Веста за наградата, како и целиот училишен колектив, ја примиле со голема возбуда и среќа.

„Кога не‘ известија дека сме ја добиле првата награда бевме пресреќни, особено учениците. За сите нас ова е поттик и понатаму да се вклучуваме во вакви активности, затоа што креативноста и работата на крај се исплатат“, вели Раманоски.

Додека од макета да прерасне во вистински паметен робот, Здравко стои во училишната зграда во Жировница да ги потсетува децата и возрасните дека треба да развиваат еколошки навики и да се грижат за животната средина.