СДСМ и ВМРО ДПМНЕ без кандидати за градоначалник во Гостивар, Матески и Димовски носители на листите

Рокот за поднесување на кандидатурите за локалните избори до Општинските изборни комисии истече ноќеска на полноќ. Партиите од македонскиот блок не поднесоа кандидатури за градоначалник на Општина Гостивар. На локалните избори во Гостивар ќе учествуваат само со советнички листи.

За градоначалник на Гостивар, ДПА ја кандидира Рената Елези, ДУИ излегува со Невзат Бејта, Алијанса за Албанците ќе бара втор мандат за Арбен Таравари, додека кандидат на БЕСА е Фадиљ Зендели.

Носители на листата за советници македонските партии се актуелните претседатели на гостиварските партиски ограноци.

Од СДСМ за Gostivarpress.mk потврдија дека носител на листата е Станиша Матески, по кого следуваат Ема Нешкоска, Рената Дуцеска, Роберт Бошкоски, Слаѓана Симуноска…

ВМРО ДПМНЕ за Gostivarpress.mk информира дека носител на листата е Гоце Димовски, а редоследот по него е Зоран Наумоски, Анета Ќироска, Александар Нанковски, Милан Јованоски…

Советничката листа на ДУИ ја предводи Африм Аручи, додека на Алијанса за Албанците Ваљбон Лимани.

Се очекува Државната изборна комисија во текот на денот да соопшти колку кандидатури се поднесени за градоначалници и советнички листи до Општинските изборни комисии.