СДСМ најавува решенија за црните еколошки точки на Гостивар

„Фактот што Русино претставува регионална депонија СДСМ ќе го реши преку приватно – јавно партнерство односно со овозможување на изградба на фабрика за рециклирање на отпад на веќе одредена локација. Со реализација на овој проект ќе се воспостави интегриран систем за управување со отпад во Полошкиот регион. Исто така, со изградба на таквата фабрика ќе се спречи досегашното загадување на животната средина, ќе се отворат нови работни места и ќе се привлечат инвеститори за таа намена. Придобивките од конкретното и конечно справување со овој проблем ќе бидат повеќекратни и ќе ги почувствуваат сите граѓани на Гостивар и околината“, најави денес носителот на листата на советници за општина Гостивар од Коалицијата на чело со СДСМ, Зоран Ангелов.

Во своето обраќање тој се осврна и на други проекти од Изборната програма кои се однесуваат на зачувување на животната средина.

„Предвидуваме замена на азбестните водоводни цевки,  изградба на прочистителна станица за отпадни води како и поставување на мерна станица за загаденост на воздухот. Гостивар нема мерна станица, но се претпоставува дека аерозагаденоста е на високо ниво. Со поставување на мерна станица ќе се знае аерозагаденоста, а со тоа ќе се преземаат мерки за нејзино намалување“, нагласи Ангелов.