Се‘ уште е непознато кој е мртвиот маж извлечен од Вардар кај Чегране, обвинителство потврди насилна смрт

И по пет дена откако беше извлечено телото на машко лице од водите на Вардар под мост меѓу селата Чегране и Тумчевиште, идентитетот на починатиот не е утврден. Јавното обвинителство ги потврди првичните сознанија, дека смртта настапила насилно од огнено оружје. Повеќе детали како се случил трагичниот настан, за сега нема. Од ЈО за Gostivarpress.mk информираа дека случајот го проверуваат, заедно со останатите надлежни институции.

„Идентитетот на починатото лице до овој момент не е утврден. Лицето има огнострелни повреди на телото, со што е потврдено дека станува збор за насилна смрт од истрели од огнено оружје. Претстојат детални проверки и извештаи со кои треба да се утврди причинско последичната врска за настанување на смртта, за што јавното обвинителство и надлежните органи во континуитет преземаат дејствија.“, соопшти обвинителството.