Седница на гостиварскиот Совет: Вработувања, финансии, годишни програми, легализација…

Советот на општина Гостивар на 24 јануари (четврток) ќе ја одржи 11-тата седница. Дневниот ред има дваесетина точки кои главно се однесуваат на работата на јавните претпријатија и урбанизмот. Советниците ќе го разгледуваат и годишниот План за вработување на општината за 2019-та, според кој во текот на оваа година се предвидени 29 нови вработувања.

На седницата ќе се дискутира за финансискиот извештај на Јавното претпријатие „Градски паркинг и зеленило“ Гостивар за периодот јули, август, септември 2018 година како и за одлуката на управниот одбор на претпријатието за  измена и дополнување на ценовникот за паркириање. Како што информираат од претпријатието, се работи за промена на цената за паркингот близу Центарот за социјала, кај градскиот парк, каде наместо досегашните 35 денари дневен билет, ќе се плаќа 20 денари за еден час.

Во врска со ЈП Комуналец, на дневен ред се ставени годишната Програма за јавна чистота на јавни површини и отворени простори на јавни објекти и  Програмата за работа на „Комуналец“ за 2019 година.

Советниците ќе се занимаваат и со Програмата за уредување на градежно земјиште, изградба, реконструкција и одржување на локални патишта на подрачјето  на Општина Гостивар и да ја одредат Листата на приоритетни проекти за уредување и изградби на локални улици и патишта за 2019 година.

Точките од урбанизмот се однесуваат на легализација на дивоградби, односно нивно вклопување во урбанистичката планска документација.