Што би се случило доколку светот остане без интернет?

Иако интернетот не ни е достапен толку долго, во последните дваесетина години се чини дека целото човештво стана зависно од мрежата на сите мрежи. Сега се чини невозможно дека би можеле да живееме без Google, социјалните мрежи и сите новости и информации кои ни се секогаш достапни и ги користиме толку многу што многумина развиле зависност од интернет и телефони. Но, додека би опстанале без вести и социјални мрежи, се поставува прашањето, што е со сите институции и инфраструктура кои ни значат живот, а кои се зависни и од интернет, како што се електрани, телекомуникации, банки итн.

Затоа интересното прашање е што би се случило доколку интернетот исчезне, односно ако целиот свет ја загуби врската со мрежата поради некоја причина. Не е тешко да се заклучи дека ќе има паника, луѓето нема да знаат што се случува, нема да можат повеќе да комуницираат, да работат итн. Какви би биле последиците по еден ден, недела, месец и година?

На крајот од првиот ден  доколку целата наша планета биде отсечена од мрежата, само Google и Facebook би изгубиле повеќе од 300 милиони фунти, а загубите на другите компании, од кои многу би престанале да работат, би биле измерени, во милијарди. Состојбата по една недела би била целосно хаотична, а од  Science Focus нагласуваат дека би имало проблем со снабдувањето со електрична енергија што доведува до бројни нови проблеми. Имено, бидејќи модерната електрична мрежа се потпира на Интернет за координација на електраните и трафостаниците, би настанал хаос во енергетскиот систем и локални прекини во дистрибуцијата на електрична енергија за повеќето земји во светот. Тоа потоа би се одразило, меѓу другото, на гасоводите кои би биле затворени затоа што се зависни и од струја и интернет.

Со оглед на тоа дека се е поврзано, би настанала верижна реакција. Без интернет и струја, ниту бензинските пумпи не можат да работат бидејќи освен што не можат да точат гориво, не можат ниту да ја следат состојбата на резервоарот. Без гориво нема достава на храна и неопходни работи во супермаркетите, а се чини дека би застанал цел свет, односно би запрел сообраќајот, индустријата и бизнисите. По еден месец светот би тонел во тотален хаос – вознемирени и гладни луѓе чии животи за кратко време радикално се промениле, сега се борат меѓу себе за веќе ограбена храна. На улиците владеат немири и хаос, а иако војската е повикана, и ним им треба гориво и залихи, кои брзо се трошат.

По една година, повеќето земји од развиениот свет сепак ќе успеат да инсталираат основни телефонски линии и општеството полека ќе се прилагоди на големите промени и хаосот, додека земјите се вратат во аграрна економија. Глобалната економија ќе се врати во 1930-тите. Последиците од губењето на интернетот може да бидат страшни.

Се разбира, сето ова е шпекулација и навистина е тешко да се предвиди како би изгледал еден таков свет и ни останува само да се надеваме дека никогаш нема да дознаеме.