Што предвидуваат законските измени кои се однесуваат на повозрасните возачи?

Измените во Законот за безбедност во сообраќајот на патиштата што се однесуваат на повозрасните возачи стапија во сила. Со нив се поместува возрасната граница за рокот на важење на возачката дозвола. Поточно, измените предвидуваат возачката дозвола да се издава со рок на важење до три години за лицата постари од 70 години, наместо до 65 години како што тоа беше случај до сега.

„Возраста на возачите претставува еден од факторите што значително влијаат врз безбедноста на сообраќајот. Според научните согледувања, најголем број од незгодите што ги предизвикуваат возачите постари од 65 години, можат да се припишат на информационите пропусти. Со стареењето, процентот на незгоди што се случуваат поради информациони пропусти и погрешно донесени одлуки, значително се зголемува. Сериозен недостаток кај старите возачи претставува можноста за навремено забележување и одржување растојание. Потребно е да се истакне дека возрасната група – постари возачи не претставува хомогена целина бидејќи меѓу нив постојат големи индивидуални разлики што се зголемуваат со текот на годините. Затоа, не е пожелно да се ограничуваат старосните граници во поглед на дозволата за возење, освен во случај кога непосредните фактори упатуваат на тоа“, соопштуваат од Републичкиот совет за безбедност во патниот сообраќај.

На лицата кои во време на издавањето на возачката дозвола имаат повеќе од 65 години, возачката дозвола им се издава со рок на важност до денот на навршувањето на 70 години возраст.