Што прво би направиле ако станат градоначалнички на Гостивар? Одговараат советничките Нешковска и Ќироска

Во последното издание на емисијата „Минути за секого“ на Gostivarpress.mk гостуваа советничките во Советот на Гостивар, Анета Ќироска (ВМРО-ДПМНЕ) и Ема Нешковска (СДСМ). Темата на разговорот главно е врзана околу прашањата на еднаквост, положбата на жените во денешниот свет и слично, но ја искористивме приликата и да ги запрашаме: Што прво би направиле ако утре станат градоначалнички на Гостивар?

Еве како одговорија:

Нешковска: Прво би се потрудила да го решам проблемот со кучињата скитници.

Ќироска: Како градоначалник на Гостивар треба многу работи да се прават за просперитет на градот во повеќе области, но еве јас како медицинар би се залагала за еколошки град.

Во емисијата стана збор и за работата на општинскиот Совет, при што Нешковска оцени дека актуелниот состав на советот кога се во прашање интересите на граѓаните умее да ги премости партиските разлики.

„Овој состав на советот навистина има слух и капацитет да работи во интерес на граѓаните, да ги слушне нивните барања, меѓутоа и да застане заеднички без оглед на разликите и политички партии многу често едногласно да ги донесе одлуките кои се во интерес на одредени категории граѓани. Тоа е за поздрав, затоа што на таков начин покажуваме дека имаме доволно и политичка и општествена свест да работиме и одлучуваме во интерес на граѓаните и она што е добро за сите нас како граѓани на Гостивар.“, рече Нешковска.

Ќироска како член на Комисијата за еднакви можности при Советот истакна дека ова тело е доста активно на полето на заштита на женските права со низа проекти и активности.

„Сите членови во оваа Комисија работиме со желба, со елан, и сме активни во сите сфери кои се однесуваат на оваа комисија, а резултатите од работата се гледаат. Годинава се направи план програма со однапред поставени цели на кои следат активности. Би издвоила дека се изгласа отворање на засолниште за жртви за семејно насислтво, и тоа е огромен напредок за нашиот град, затоа што колку и да сакаме да го избегнеме насилството, не можеме, за жал има се‘ повеќе жртви на семејно насилство на кои им треба поддршка. Исто така, за време на 16 дена активизам за борба против рак на дојка лани, сите едногласно изгласаме бесплатна мамографија за жени кои се борат со болеста и имаше олем интерес.“, рече Ќироска.

Целата емисија може да ја погледнете подолу или на Јутуб каналот на Gostivarpress.mk