Силни контроли, строги казни – Гостиварската полиција објавува „војна“ против пукачите на свадби

Пукањето со огнено оружје на свадбени свечености и неовластено користење на огномети најстрого ќе се казнува, најавуваат од СВР Тетово нагласувајќи дека борбата против оваа појава, која во летниот период е секојдневие во полошко, ќе биде бескомпромисна.

„ Ќе се применува нула толеранција, секој што ќе користи огнено оружје ќе се соочи со санкции, без исклучок. Полицијата „врти нов лист“, затоа што очигледно е дека апелите, предупредувањата и укажувањата не го даваат посакуваниот ефект. Граѓаните продолжуваат со опасната традиција на славење со пукање и неовластено користење на пиротехника, што може да биде крајно опасно. Потенцираме дека контролите ќе бидат засилени и ќе ги опфатат и свадбарите и угостителите.“, вели портпаролот на СВР Тетово, Марјан Јосифоски.

Сезоната на свадбени свечености во гостиварско ја одбележуваат секојдневни нарушувања на јавниот ред и мир, но и инциденти со повредени. Во селото Чајле на свадба која се одржувала во двор од куќа, беа ранети две жени. За осомничениот за пукањето беше определен притвор.

Две други лица завршија во Полициската станица Гостивар, заради пукање со оружје и незаконско користење на огномет.