Синдикатот бара К-15 и за вработените во образованието

Откако Владата даде зелено светло за колективниот договор на органите на државната управа, стручните служби на Владата, судовите, јавни обвинителства, казнено – поправни и воспитно – поправни установи, државното правобранителство,  единиците на локалната самоуправа, агенции, фондови и центри за социјални работи и други органи основани од Собранието, СОНК достави барање за итно потпишување на Општ колективен договор за јавниот сектор.

Тоа би значело и вработените во образованието да добиваат К-15, слободни платени денови, дневници за службени патувања, итн.

„СОНК смета дека е неприфатливо Министерството за труд и социјална политика, континуирано да го избегнува ова прашање последниве неколку години, особено по се почестите и погласни барања на СОНК во рамките на Конфедерацијата на слободни синдикати на Македонија – КСС, барање кое беше јавно упатено на бројните протести ширум нашата држава. Исто така, смета дека заедничките прашања во јавниот сектор треба да се уредат или доуредат со Општиот колективен договор и да бида опфатени сите вработени во јавниот сектор. Во спротивно, доколку општите придобивки, како што се регрес за годишен одмор, популарниот К-15, слободни платени денови, дневници за службени патувања итн. се уредуваат со Грански колективен договор, а особено ако тој грански синдикат претставува многу мал процент од вработените во јавниот сектор, во тој случај се прави огромна дискриминација од причини што буџетските средства по ист основ не се трошат подеднакво за сите буџетари. Во вој случај државата како најголем работодавач, за некого ќе биде ‘мајка’, а за некого ‘маќеа’“, се вели во соопштението од СОНК.