Снег во земјава, и во Гостивар снежни врнежи

Денес (сабота) владее облачно и студено време со врнежи од снег. Врнежите наместа се пообилни, особено во западните делови. На планините ќе се формира значителна снежна покривка (над 30 см), а во пониските места од 3 до 10 сантиметри. Дува умерен до засилен ветер од северен правец, особено долж Повардарието и температурите значително опаднаа, а има и појава на голомразица.

И Гостивар се разбуди под снежна покривка и значително постудено време.  Утринската температура падна до -6, а максималната дневна ќе биде 1 степен.

АМСМ соопшти дека забрани за движење на тешки товарни возила се воведени на превојот Стража и патот Маврово-Дебар.

Локални врнежи од снег, како што информира УХМР, ќе има и во недела претпладне. Од понеделник времето ќе биде стабилно со појава на магла по котлините и со ниски утрински температури кои насекаде ќе бидат негативни и наместа ќе се спуштаат и под -15 степени.