Со Ахмети немам лични контакти, никогаш не сум бил член на политичка партија, вели Абази

Новиот шеф на Јавното обвинителство за гонење организиран криминал и корупција, Ислам Абази на првата прес конференција што ја одржа денес ги кажа зацртаните приоритети во раководењето и одговараше на новинарски прашања.

„Сакам да им се заблагодарам на колегите кои излегоа и учествуваа во овој изборен процес. Ова е ново законско решение на избор и целта е да се дојде до поголема самостојност на обовинителството и да се избегнат сите надворешни влијанија. Освоените 66 гласа се голема одговорност за мене и мотив, колку што можам најпрофесионално да раководам со ова обвинителство. Најпрво ќе се запознаам со состојбите и работите во обвинителството, приоритетно ми е да ги пополниме празните места со обвинители, во истражниот центар и да воведеме дигитализација.“, рече Абази.

На новинарско прашање дали има блиски релации со ДУИ и контакти со Али Ахмети, новишт прв човек на обвинителството одговори: „Ниту сум, ниту некогаш сум бил член на политичка партија. Ниту во моето досегашно работење сум оставил впечаток на блискост до некоја политичка партија. Лични контакти со Али Ахмети немам, го познавам само како мој соселанец”.

Во однос на транспарентноста и јавноста, Абази рече дека согласно Законот за ЈО, тие се должни да бидат транспарентни и да информираат за работата по некои предмети кои будат интерес во јавноста, меѓутоа и дека треба да се зачува угледот и достоинството на обвинетите, оштетените и сите учесници во постапка.

Абази својата кариера ја почнува од јавен обвинител во ОЈО Кичево, ја продолжува во Вишо јавно обвинителство Гостивар, каде станал и раководител.