Со грант од 2,5 милиони денари Општина Гостивар ќе купува возило за одржување на улично осветлување

Општина Гостивар е добитник на грант од Меѓународната банка за обнова и развој – Светска банка во висина од 2,5 милиони денари, пари кои локалната самоуправа сака да ги намени за купување на возило за одржување на улично осветлување. Специјалното возило би се користело за потребите на општината и на јавните претпријатија.

За да го купи возилото, локалната самоуправа претходно треба да добие зелено светло од Советот на општината, односно советниците треба да ја усвојат одлуката за набавка на возилото.

„Вредноста е предвидена во буџетот на Општина Гостивар во програмата за капитални расходи. Ако вредноста на возилото ја надмине вредноста на грантот, Општина Гостивар ќе обезбеди средства за кофинансирање.“, се наведува во предлог одлуката, која ќе се разгледува на седницата на Советот во вторник (25 јуни).