Сојузот на средношколци и МОН се договорија за државната матура

Сојузот на средношколци и Министерството за образование најдоа компромис околу државната матура. Од средношкослата организација информираа дека викендов донеле одлука да се прифати решението кое предвидува полагање на два екстерни и два интерни испити, односно третиот екстерен испит да се организира интерно.

„Овој чекор повлекува промени и во начинот на добивање на поените за државната матура, па екстерните испити ќе носат најмногу 20 поени (наместо сегашните 30), интерните најмногу 16 (наместо сегашните 6) и проектната задача ќе продолжи да носи најмногу 4 поени. Сојузот смета дека ваквиот начин на распределба на поените е поправеден и порамномерен за сите матуранти. Дополнително, искрено веруваме дека комромисот што го постигнавме ги задоволува нашите два клучни принципи: квалитетот на образованието и интересот на учениците. Решението го брани интересот на учениците бидејќи им овозможува на амбициозните матуранти да се запишат на странски универзитети, а пак присуството на поголем број на интерни испити го олеснува процесот на подготовка за испитот. Поправедната распределба на поените значи дека и доколку еден ученик се здобие со послаба оценка на еден испит, таа оценка нема да влијае значително на бројот на поени.“, соопшти Сојузот додавајќи дека до Владата испратиле три услови: Формирање на работна група меѓу Државниот испитен центар и Сојузот. Наставниците да ги споделат материјалите за интерните испити со своите ученици најмалку 3 недели пред денот на испитот. Ззголемување на коефициентот за добивање на поените доколку екстерниот испит е несоодветен за студиите на кои се запишува ученикот.

Министерството за образование и наука излезе со соопштение во кое се вели дека предложениот модел е во интерес на сите матуранти, а се задржува стандардот од 4 испити (2 екстерни и 2 интерни). „Ниту еден матурант нема да биде оштетен. Уште утре Матурскиот одбор ќе ги разгледа сите  прашања кои произлегуваат од предложените услови по што ќе се воспостави методологијата за полагање на државната матура. Министерството за образование и наука во соработка со Матурскиот одбор навремено ќе ги информира матурантите за направените промени со цел успешно да се подготват за претстојното полагање на испитите.“, соопшти МОН.