Состанок со директорите на училиштата: Онлајн наставата за учениците од Гостивар со големи проблеми

Учењето преку интернет за учениците на гостиварското подрачје се одвива со низа проблеми, но се прават напори што поголем дел од децата да се вклучат во процесот, беше речено на состанокот меѓу локалната самоуправа на Гостивар и директорите на општинските основни и средни училишта.

Директорите информираа околу активностите што се преземаат во моментов, како и за проблемите со кои се соочуваат наставниците и учениците при спроведување на онлајн наставата.

Градоначалникот Арбен Таравари им се заблагодари на директорите и на наставниот кадар што со максимална посветеност, успеваат учениците барем да не ја изгубат навиката на ангажман и следење настава, и посака епидемијата на коронавирусот во нашата земја успешно да се надмине и кон средината на наредниот месец, да се продолжи со редовна настава.

„Со оглед на тоа што во моментов не постои унифицирана платформа за спроведување на ваков вид настава, и поради тоа што владата не изготвила акционен план, а се доцни и со снабдувањето со соодветна технолошка опрема за ученици кои доаѓаат од семејства со социјално загрозен статус, наставниопт процесот се одвива со големи проблеми, но сепак опфатеноста на учениците достигнува до околу две третини.“, наведоа од Општина Гостивар.

Раководителката на секторот за образование, Аслиан Снопче информираше дека додека училиштата се затворени, времето ќе се искористи за извршување на планираните работи во училишните згради, а една недела пред да се продолжи со настава, објектите ќе бидат целосно дезинфицирани.