Совети и препораки за гостиварци околу намалување на ризиците од пожари

Дирекцијата за заштита и спасување го опфати и Гостивар со кампањата за намалување на ризиците од пожари. На градскиот плоштад беше поставен штанд, каде вработените во Подрачната единица на Дирекцијата, делеа брошури и даваа совети на граѓаните во врска со превенцијата и заштитата од пожари на отворен простор.

„Целта на оваа кампања не е само да се делува превентивно, туку и едукативно, преку поттикнување на свеста на населението за сите можни ризици што ги носат пожарите како катастрофа, со оглед на тоа што се наоѓаме во критичен период во година за појава на пожари на отворен простор“, велат од Дирекцијата за заштита и спасување.

Кампањата се води под мотото „Иднината им припаѓа на оние кои се подготвени“.

Во насока на превенција на пожарите на отворено, Дирекцијата за заштита и спасување во соработка со МВР и Министерството за земјоделство, во март донесе забрана за движење во шуми и шумско земјиште за сите граѓани, освен за вработените кои управуваат со заштитените подрачја од сите категории.