Советот на Гостивар ќе одлучува за измени во планот за вработувања во општината

По неколку месеци онлајн заседавање, Советот на Општина Гостивар повторно ќе се собере во општинската сала. Закажана е нова седница, во четврток (27 август), која ќе биде со физичко присуство.

На дневен ред се дваесетина точки од областа на финансии, буџет, урбанизам, образование и друго. Пред советниците ќе се најде и предлог за изменување и дополнување на Планот за вработување во Општина Гостивар за 2020-та година. Во документот се предвидуваат 58 нови вработувања, наместо првичните 45.  Од 58, три се однесуваат на унапредување на успешни административци, а едното е пополнување на работно место поради пензионирање. 16 места се за во Противпожарната единица. Останатите се во различни општински сектори.

Актуелно во општината се вработени 132 лица од кои 102 се Албанци, 22 Македонци, 6 Турци и 2 Роми.

На дневен ред на седницата во четврток ќе биде и одлука за формирање на градинка во состав  на Јавна Општинска Установа Детска Градинка “Детска Радост”, што се наоѓа во дел на објектот на ОУ “Мустафа Кемал Ататурк” во Долна Бањица.