Средношколците ќе протестираат – сакаат комбинирана, а не само онлајн настава

Унијата на средношколци во петок (28 август) ќе организира протестен марш против одлуката, наставата во новата учебна година да се одвива само онлајн. Средношколците бараат комбинирана настава.

„Дел од учениците да ја следат наставата од дома, т.е. онлајн, а останите физички да присуствуваат во училниците. Учениците да се менуваат на смени. Засилени хигиенски мерки, задолжително носење маски. Сметаме дека комбинираниот метод е најдобар и најефикасен поради повеќе причини“, велат од Унијата.

Протестниот марш во петок ќе се одржи во Скопје, ќе започне пред МОН, а ќе заврши пред Влада, каде учениците ќе ги пренесат своите ставови и барања за наставата.

Министерството за образование донесе одлука новата учебна година да почне онлајн, освен за учениците од прво до трето одделение и за училишта со мал број на деца во одделенијата. И во овие два случаи, родителите имаат право на избор, дали ќе ги праќаат децата во училиште или ќе се определат за настават преку интернет.