Стојаноска на средба со неколку здруженија во Тетово: Ќе направиме повеќе за сите граѓани

Носителката на листа во Изборната единица 6, од Коалицијата „Обнова за Македонија“ предводена од ВМРО-ДПМНЕ, Дафина Стојаноска, денеска беше во посета на Тетово, каде се сретна со членови на Здружението на слепи лица од Тетово, Здружението на глуви лица од Тетово и со Здружението на лица со телесен инвалидитет “Мобилност” за Тетово и Гостивар, со цел да разговараат за проблемите и барањата на овие лица.

„Денес остварив средби со Здружението на слепи лица од Тетово, Здружението на глуви лица од Тетово и со Здружението на лица со телесен инвалидитет “Мобилност” за Тетово и Гостивар. Имавме интересни и конструктивни разговори, на кои овие луѓе кажаа дека изминативе три години имале можност да видат и увидат кој и колку им излегол во пресрет на нивните проблеми и барања. Исто така, заеднички заклучивме дека тоа што Зоран Заев остана слеп и глув спрема граѓаните, како пред, така за време, а и после Референдумот од 2018-та година, е најголемиот хендикеп за Република Македонија. Затоа, ние кандидатите за пратеници од ИЕ6 на ВМРО-ДПМНЕ и коалицијата “Обнова на Македонија”, се обврзуваме дека од 15-ти јули ќе направиме повеќе за секого, но повеќе и за овие наши сограѓани“, изјави Стојаноска.