Свеченост за новата генерација матуранти од средното техничко училиште во Гостивар

На свечена манифестација, во присуство на голем број гости, родители, пријатели, претставници од институции, во средното техничко училиште во Гостивар, денес беше промовирана новата генерација на матуранти.

„Овој ден матурантите го чекаат цела година, а подготовките за свечената манифестација траеа еден месец. Како директор, горд сум на се` што сме постигнале за училиштето и на успехот на учениците. Денешниот ден го користиме и како еден вид промоција на нашето училиште пред полуматурантите, кои се надеваме дека ќе покажат интерес да го продолжат образованието кај нас“, рече Ибрахим Асани, директор на техничкото училиште.

Од ова училиште, годинава со диплома за завршено средно образование, излегуваат стотина  ученици на трите наставни јазици, македонски, албански и на турски.

На свечената промоција беа прогласени и најдобрите ученици на генерацијата. Свеченоста се заокружи симболично со фрлање на капите и честитки за матурантите.