Света Литургија за Митровден во црквата “Св. Димитриј” во Гостивар

Утрово, (8 ноември 2023), во храмот “Св. вмч. Димитриј” во Гостивар, со чиноначалствување на Митрополитот Тетовско-гостиварски г. Јосиф беше отслужена света архиерејска Литургија по повод светиот великомаченик Димитриј Солунски, кој се прославува на овој ден, низ народот уште познат како – Митровден.

По завршувањето на Литургијата, Митрополитот г. Јосиф се обрати кон верниот народ со вдигање на својата пригодна беседа, истакнувајќи го значењето на Св. Димитриј и неговиот живот како пример за секој православен христијанин:

„Денеска прославуваме еден голем маж на светата Православна црква. Маж кој својата вера ја посведочил со мачеништво. Тоа е светиот великомаченик Димитриј, Солунскиот чудотворец. И ние да се поучиме од Димитриевиот живот и да направиме добри дела како неговите, кои ќе сведочат за нас и нашата вера и праведен живот. На овој ден – Митровден е и погодна прилика да се запрашаме дали и како живееме христијански? Дали го сведочиме Христа? – Мерило за тие прашања нека ни биде животниот пат на денешниот светител. Тој пат е одличен пример за тоа како треба да живее еден православен христијанин, како треба да го сведочи Христа Бога. Секој од нас е повикан да биде сведок на Христос, како што бил и светиот Димитриј, кој сведочел за Бога и за вистината борејќи се сѐ до смртта, така што пролевајќи ја сопствената крв оставил сведоштво за „тајната на побожноста“ (1 Тим. 3,16). Тие сведоци што го дале и загубиле својот живот за верата ние ги нарекуваме маченици, а мачеништвото, драги браќа и сестри – е крајниот настан преку кој христијанинот сведочи за верата во Христос. А да се биде сведок Христов треба постојано да се биде подготвен за жртва и сведоштво по примерот на Христос. Христовата жртва и сведоштва треба да се наш редовен потсетник за тоа што вистински значи да се биде христијанин. А да се биде вистински христијанин значи да се биде добар верник, кој живее според верата и според православните прописи и преданија. Нека овој голем светител Димитриј, биде наш заштитник пред Бога и молитвеник за сите нас, а ние да не престанеме во нашиот живот, живеејќи христијански на дело да сведочиме за вистинската вера во Христа на мачениците. Да се сведочи и да се живее христијански не е воопшто помало мачеништво, а маченик е секој кој живее на Христов начин, односно еден богоугоден и христијански живот. Големите страданија и жртви – носат и големи радости, затоа и сите ние да се трудиме да правиме жртви и духовни подвизи, да се распнуваме со Христа, за да и воскреснеме во Неговото царство, сега и секогаш и во сите векови“.