Светот ја слави безграничната моќ на стихот

„Поезијата е чин на мирот“, ќе напише познатиот чилеански поет и нобеловец Пабло Неруда. Денешниот датум, 21-ви март го обединува светот преку безграничната моќ на стиховите. УНЕСКО го одреди овој ден во 1999 година како Меѓународен ден на поезијата, препознавајќи ја како уникатен начин на експресија на креативниот дух на човековиот ум.

Меѓународниот ден на поезијата носи порака да се почитува пишаниот збор, да се слави стихот и да се чита повеќе.

Наш придонес кон одбележувањето на денот ќе бидат стиховите на Анте Поповски, македонски поет, есеист, препејувач и публицист.

Од сина тишина зборови

Од сина тишина создавав зборови
и од зборови те создавав тебе
те поведов низ младоста, низ цел живот
една по една да ги собираме трошките
на кои постапно се распаѓавме.

Сега, легнувајќи во самите корени
на новиот век
се загледуваш во мене
и ги згаснуваш една по една
ѕвездите во моите очи.
Така, обезѕвезден, влегувам во предел
на света бессоница,
во предел на морничав студ.

О, поезијо, девојко со вкус на вечност.