Светски ден на велосипедот – возете често за здравје и среќа!

Генералното собрание на ООН во април 2018 година го прогласи 3 јуни за Светски ден на велосипедот. Ова е добар повод да се потсетиме на придобивките од возење на велосипед.

Истражувањата докажале дека редовното возење со велосипед, поточно вртењето на педалите, го намалува ризикот од срцеви заболувања дури до 50%. Доколу луѓето го практикуваат ова, годишно во светот би се избегнале 10 илјади инфаркти. Позитивно делува и врз работата на белите дробови.

Возењето велосипед ги зајакнува мускулите, зглобовите стануваат поподвижни, а се подобрува и држењето на телото. Незаменлива активност е за губење на вишокот на килограми, а при тоа да не мора да држите некои ригорозни диети. Велосипедот го чува вашето ментално здравје и го намалува стресот, кој е причина за појава на многу болести и нарушувања во денешницата. При возење велосипед организмот ослободува ендрофин, хормон на среќата.

Освен што е добро за вашето здравје, возењето велосипед е добро и за буџетот. Ако автомобилот го замените со велосипед, ќе си заштедите пари. Плус ќе ги избегнете гужвите и метежот низ улиците, па ќе стигнете до посакуваното место побрзо.

Секако на крај, да не заборавиме дека уште една причина е зачувувањето на животната средина. Велосипедите за разлика од автомобилите не предизвикуваат еколошки штети.