Светскиот првак во танц од Гостивар Анди Исмаили на прием кај премиерот

Малиот гостиварец, Анди Исмаили кој неодамна стана светски шампион во современ танц, заедно со своите родители и ментори, беше на прием кај премиерот Зоран Заев.

„Тоа е огромна сатисфакција за твојот труд и испраќа моќна порака до сите млади да бидат мотивирани и да се занимаваат со танц или со спортски активности и да ги остваруваат своите соништа. Ова е огромна чест за нашата држава, да те гледаме на пиедесталот и да се интонира нашата химна“, рече Заев на средбата.

Како што информираат од прес службата на Владата, премиерот со Анди и неговите родители и ментори разговарале за искуството од настапот на првенството во Полска, каде во голема конкуренција од над 30 земји го освои првото место, како единствен танчер кој за својот настап доби највисоки оценки од сите девет судии.

Анди на Заев му подари фотографија од доделувањето на медалот и пехарот, а премиерот му посака успех и на Европското првенство во модерен џез и класичен балет, кое идната година во јуни ќе се одржува во Скопје и порача дека неговите заложби и заложбите на Владата за подржување на сите млади, за развивање на нивните таленти  ќе продолжат, ценејќи го нивниот труд, ентузијазам и  мотивација за наредни успеси и остварувања.