Светско првенство во ракомет: Македонија започнува денес против Шведска

Како-така, Македонија се најде на Светското првенство во ракомет кое стартуваше вчера во Египет и денес го започнува својот седми настап на ракометните Мундијали во групата Г со натпреварот против селекцијата на Шведска.

Нашата селекција во Египет допатува во подмладен состав, но е предводена од капитенот Кире Лазаров и искусните Стојанче Стоилов и Никола Митревски, а во составот се и ракометари кои веќе имаат искуство од настапи на големите натпреварувања. Во екипата се дури седум дебитанти и за нив ова ќе биде огромно искуство за продолжението на кариерата.

ГОЛМАНИ: Никола Митревски (Порто), Мартин Томовски (Лудвигсхафен), Никола Даниловски (Охрид)

ЛЕВИ КРИЛА: Димитар Димитроски (Вардар), Цветан Кузманоски (Еурофарм Пелистер 2)

ДЕСНИ КРИЛА: Мартин Поповски (Амичитија Цирих), Ненад Костески (Еурофарм Пелистер)

ЛЕВИ БЕКОВИ: Филип Талески (Вардар), Марко Мишевски (Вардар), Дарко Георгиевски (Анжер), Михајло Младеновиќ (Металург)

ЦЕНТРАЛНИ БЕКОВИ: Филип Кузмановски (Хановер), Марио Танкоски (Еурофарм Пелистер), Горан Крстевски (Фочани)

ДЕСНИ БЕКОВИ: Кирил Лазаров (Нант), Мартин Велковски (Еурофарм Пелистер), Мартин Серафимов (Металург)

ПИВОТИ: Стојанче Стоилов (Вардар), Никола Маркоски (Еурофарм Пелистер), Жарко Пешевски (Штутгарт)

Швеѓаните се ослабени со отсуство на неколку клучни ракометари, така да шансите за први бодови на првенстово се изедначени.

Натпреварот се игра во Каиро, а почетокот е закажан за 20 часот и 30 минути.

Засега најголем белег од Светското првенство остави лошата организацијата и условите на кои реагираат скоро сите селекции кои се наоѓаат во Египет, нарекувајќи ги првенството пародија. На првите натпревари кои се одиграа вчера на трибините имаше и до 1000 луѓе, иако ЕХФ одлучи да се игра без публика.