Таравари го презеде мнозинството во Советот на Општина Гостивар

На денешната седница на Советот на Општина Гостивар се случи пресврт со советничкото  мнозинство.

Претседателот на Советот, Насир Муслиу од ДУИ, поднесе оставка на почетокот на седницата, по што за нов претседател беше избран Бесим Мемеди, од Алијанса на Албанците.

По изборот, Мемеди се заблагодари на довербата и изјави дека очекува поддршка во работата од сите советници.

Со ова се формираше ново мнозинство во Советот, кое го предводи партијата на градоначалникот Арбен Таравари, Алијанса на Албанците.

Советникот на СДСМ, Зоран Ангелов реагираше на ваквиот начин на избор, потенцирајќи дека се прекршени деловникот и законите. Како што нагласи, по оставката на Муслиу, седницата требало да ја преземе и води најстариот советник од Советот, па дури потоа да се прави избор, а тие процедури не биле запазени.

Инаку, за изборот на Мемеди, двајцата советници од НДП беа воздржани, додека советникот од Демократски сили на Ромите, Кашмир Салиу, кој до сега ги поддржуваше ДУИ и СДСМ, гласаше „за“.