Таравари: Пожарот на Русино беше подметнат

Градоначалникот на Општина Гостивар, Арбен Таравари изјави дека големиот пожар на депонијата Русино од пред околу три недели, бил намерно предизвикан. Тој нагласи дека централната власт, иако ги има ингеренциите за регионалните депонии во свои раце, доцна се вклучила со гаснење на огнот.

„Некој го подметна пожарот на депонијата Русино, тоа е сигурно. Пожарот не беше на едно место, туку на повеќе места на депонијата. Кој и зошто тоа го направил, нема да навлегувам. Но, едно е евидентно, ингеренциите за регионалните депонии веќе година и половина ги има Владата, општините немаат никакви ингеренции. Гореше голем пожар, а ние 24 часа немавме никаков одговор од Владата. Јас бев во дирекна комуникација и со премиерот и со генералниот секретар и само ни кажуваа убави зборови, дека екипи ќе стигнат, ќе дојдат, планираат, ќе биде. Дури откако поминаа 24 часа, на денот на празникот Бајрам ангажираа фирма, веќе кога Тетово и Гостивар успејаа да го исконтролираат до некаде огнот. Им благодарам и за толку, а во оваа прилика би сакал јавно да и се заблагодарам на градоначалничката на Тетово, Теута Арифи која беше единствена која заедно со Општина Гостивар, веднаш реагираше да се среди пожарот.“, изјави градоначалникот.

Таравари јавно побара од Владата, или да ги врати ингеренциите за депониите кај општините, односно Центрите за плански развој или да најде трајно решение за нивно уредување и одржување според стандардите.

Градоначалникот денес, заедно со министерот за локална самоуправа Горан Милевски и градоначалникчата на Тетово, Теута Арифи ја промовираа првата фаза од асфалтирањето на патот до депонијата Русино.