Трибина во гостиварската гимназија: Борбата за родовата еднаквост е борба за човечност

„Осми Март е важен ден и не треба да се претвори во парада на ружи, подароци и патувања, туку во ден кој не потсетува дека борбата за правата на жените и еднаквоста во општеството и семејниот живот се уште трае. Борбата за родовата еднаквост е борба за човечност, не борба за женските права.“, ова беше заклучокот од денешната трибина по повод Денот на жената, која се одржа во гимназијата во Гостивар.

Средношколците со своите професори дискутираа по прашања врзани со правата на жените и родовата рамноправност, колку жените се застапени во политиката, зошто во светски рамки за истата работа жената е помалку платена од мажот, дали жената и мажот имаат иста родителска одговорност и слично.

Настанот опфати и проекција на краки документарни и анимирани филмови: “Историјата на интернационалниот ден на жената”,”Како децата ја разбираат родовата нееднаквост”,”Половата нееднаквост на работното место”, “Не сум сама” и “Соништата немаат пол”. Трибината се организираше како дел од програмата „Мировно образование“ на Првата детска Амбасада „Меѓаши“ под менторство на професорките Валентина Штерјовска и Билјана Ристоска.