Тромботичен ефект кај девојка од Македонија која примила „Астра Зенека“ во Србија

Дваесет и осум годишна девојка, која примила вакцина против ковид од „Астра Зенека“ во соседна Србија, е хоспитализирана поради тромботична реакција.

„Има регистрирано еден случај на 28 годишна девојка, таа од вчера се наоѓа на болничко лекување со тромботичен ефект, кој се поврзува со примање на една доза од вакцината „Астра Зенека.“. Реакцијата се јавила после 6-7 дена од вакцинирањето. Во однос на нашите граѓани кои изминатиот период примија прва доза вакцина во Србија, нема некои препораки дали треба нешто превентивно да се прави. Во однос на ревакцината, сите кои се вакцинирани ќе бидат ревакцинирани, согласно препораките што ги очекуваме следниот период“, информираше министерот за здравство, Венко Филипче.

Во земјава денес почна вакцинација на населението со „Астра Зенека“, а последната одлука на здравствените власти е дека оваа вакцина нема да се дава на помлади од 60 години.

„Следејќи ги примерите на Канада и Германија и ние ќе бидеме претпазливи со оваа вакцина, и одлучивме да не ја даваме на лица под 60 години. Денеска ќе имаме состаноци со Комисијата за безбедност во Агенцијата за лекови, да размениме информации. Иако се ретки овие тромботични реакции, мораме да бидеме многу претпазливи“, рече министерот.