Турнири во шах, кошарка и мал фудбал во училиштата во Гостивар

Преку разни спортски и културни активности на младата популација во Гостивар, ќе се развива духот на толеранцијата, ќе се поттикнува соработка и поврзување на децата од различни етникуми како и градење на мирен соживот. Ова се дел од целите на проектот „Јакнење на отпорноста на локалните заедници против насилен ектремизам во Македонија“, во кој Гостивар е вклучен како една од пилот општините, заедно со Кичево и Чаир.

Во негови рамки денес беа организирани повеќе спортски натпревари низ училиштата, кои започнаа со турнир во шах во ОУ „Гоце Делчев“.

„Секој месец се предвидува да се организираат различни активности од спорт и култура. Во Гостивар денес имаме турнир во шах, мал фудбал и кошарка во кои учествуваат основци и средношколци од различни националности“, рече Марко Соколовски, координатор на активностите.

За најдобрите ученици и тимови во денешните натпревари организаторите обезбедија пригодни награди. За училиштата пак, беше донирана спортска опрема.

Проектот, кој го спроведува Центарот за заедничка основа од Скопје ќе трае во период од две години и е поддржан од Британската и Холандската Амбасада. Предвидено е формирање на работни групи од локалните институции, кои ќе изработат Акциски план со мерки и препораки. Дел од нив ќе бидат вметнати во  Националната стратегија за борба против насилниот екстремизам.