Убиецот на жената во гостиварски Вруток се‘ уште не е пронајден

Десетина дена по убиството на жена што се случи во гостиварското село Вруток, се‘ уште се трага по сторителот. Додека во јавноста се појавуваат низа шпекулации и верзии, нема  официјална информација за тоа кој, како и зошто посегнал по животот на 55 годишната Б.А.

Истрагата е во тек и надлежните институции не откриваат повеќе детали. Останува непознато каде е нејзиниот сопруг, дали во куќата било провалено, се случила ли кражба итн.

„По наредба на јавен обвинител беше извршена обдукција на телото на починатата, при што се потврди дека станува збор за насилна смрт. Се уште се постапува по издадените наредби и насоки од Основното јавно обвинителство Гостивар за откривање на сторителот на кривичното дело.“, стои во одговорот од обвинителството на прашањата на Gostivarpress.mk за случајот.

За убиството пошироката јавност беше информирана на 26 април, кога обвинителството соопшти дека бил извршен увид во семејна куќа во селото Вруток, каде претходниот ден било пронајдено безживотно тело на жена со повеќе убодни рани од нож. Жената била по потекло од Република Албанија, родена 1967 година, а била мажена и живеела во Вруток. Според првичните сознанија, смртта настапила околу 24-48 часа пред нејзиното пронаоѓање.