УХМР со предупредување за поројни дождови и силен ветер

Управата за хидрометеоролошки работи соопшти дека од денеска попладне до понеделник (11 јануари) ќе преовладува облачно време со врнежи од дожд. УХМР издаде предупредување дека врнежите во западните и северозападните делови повремено ќе бидат пообилни (над 50 л/м2) и поројни, проследени со засилен ветер кој на места ќе достигнува брзина и над 70 км/час.

Наврнат воден талог за изминатите 24 часа до 7 часот (во л/м2): 28 Дебар, 24 Пожаране, 21 Тетово, 16 Крива Паланка, 11 Берово, 9 Крушево, 8 Скопје-Зајчев Рид, по 6 Скопје-Петровец, Куманово, Охрид и Прилеп, по 4 Штип и Струмица, по 3 Претор и Демир Капија, по 2 Битола и Дојран.

УХМР известува дека од врнежите водостојот на повеќето реки е зголемен, а особено висок водостој има Радика. Се препорачува да се избегнува движење покрај реките, а доколку е неопходно максимално да се внимава.