Успешна прва крводарителна акција во 2022-ра година во Гостивар

Во просториите на Службата за трансфузиологија во гостиварската болница, денес се спроведе првата крводарителна акција за годинава. Гостиварци уште еднаш ја докажаа својата хуманост. Крв даруваа 20-тина граѓани.

Медицинските лица се задоволни од интересот и го повторуваат апелот секој здрав човек да дарува крв, која е потребна за спасување животи.

„Задоволни сме од одзивот, во Гостивар навистина има хумани луѓе, кои редовно даруваат крв. Ја користам приликата да апелирам до сите здрави граѓани да станат крводарители, со што може да спасат нечиј живот“, рече Џијана Алији, биохемичар во трансфузиологија.

Од Службата за трансфузиологија во Гостивар велат дека располагаат со доволно резерви на крв и крви единици за да се покријат потребите за пациентите.

Денешната акција ја организираше Општинската организација на Црвениот крст во соработка со трансфузиологија.