Утре во Гостивар протест против дигитализација на учебниците

Граѓанската иницијатива „Учебници и настава мора да има“ утре (15 мај) организира протести низ градовите во земјава, како и марш во Скопје, во знак на незадоволство од воведувањето на дигитални учебници и други најавени реформи во образованието. Протест ќе се одржи и во Гостивар, во 12 часот пред зградата на општината. Локалните координатори упатија повик до гостиварци да се приклучат и да дадат поддршка во што поголем број.

„Ги повикуваме родителите, наставниците, учениците и сите засегнати да излезат на протестот и секој со себе во рака да понесе книга, заедно да покажеме дека сме против оваа експериментална реформа.“, рече Фисник Рустеми, локален координатор на иницијативата за Гостивар.

Иницијативата претходно организираше бојкот на наставата и достави неколку барања до Министерството за образование: предметите да се изучуваат од хартиени учебници, да се исфрли родово сензитивната содржина од учебниците, да не се спојуваат предмети и родителите да бидат вклучено во образовните политики. Одлуката за протести дојде откако нивните барања не беа прифатени од надлежните.