Летале парчиња од кров, паднало дрво и рекламна табла

Откорнати делови од покриви, повеќе оштетени автомобили, паднато дрво во паркот. Ова се последиците од јакиот ветар кој дува во гостиварскиот регион од вчеравечер. За среќа, иако постоел голем ризик, во случаите нема повредени лица.

Околу 12 часот, ветрот оддувал дел од кров на станбен објект на ул„18-ти ноември“ кој паднал врз два автомобили (голф 5 со гостиварски таблици) на ул„Илинденска“и значително ги оштетил. Парчиња од конструкцијата завршиле и врз каблите меѓу околните згради. Штетата дополнително ќе се утврдува.

Силниот ветар кој достигна брзина од над 80 километри на час, предизвика слични проблеми и во друг дел на ул„18-ти номеври“ близу џамијата. Таму паднало рекламна табла врз шофершајбна од  фолксваген туран. Според проценките на сопственикот, направена е штета од околу 8.000 денари.

Во големиот градски парк близу стадионот, ветрот соборил едно од дрвјата, од што нема повредени, ниту оштетувања.

Други последици и оштетувања сега за сега не се пријавени.