Владата дозволи обложувалниците и казината да работат онлајн додека трае коронакризата

Спортските обложувалници, казината и другите економски оператори на игри на среќа ќе може да ја организираат својата работа на интернет. Владата на денешната седница усвои Информацијата за приредување на интернет игрите на среќа во време на вонредна состојба и донесе Уредба со законска сила за примена на Законот за игри на среќа и забавните игри за време на вонредна состојба.

„Со уредбата им се овозможува на економските оператори што организираат игри на среќа да ја продолжат онлајн (преку интернет) својата дејност, со што се создаваат услови да се сочуваат 7500 работни места во оваа дејност. Со оваа уредба се обезбедува можност за наплата на приходи во Буџетот кои до донесувањето на одлуката за мерки за спречување на внесување и ширење на коронавирусот, се генерираа од обложувалниците, автомат клубовите и казината и кои престанаа да се наплатуваат бидејќи на 15 март 2020 година приредувачите на овие услуги ги затворија сите уплатно исплатни места и деловни простории во кои ги приредуваат игрите на среќа. “, соопштија од владината прес служба.