Во акција се собра еден камион ѓубре од дивата депонија близу полицијата во Гостивар

Екологисти и граѓани волонтери, повторно спроведоа акција за чистење на мини депонијата која се создава кај зградата близу полициската станица во Гостивар. Оваа локација покрај која секојдневно минуват голем број на граѓани, е нагрдена од купишта ѓубре, расфрлан разновиден отпад и градежен шут. Иако еко-активистите и претходно ја чистеа, несовесни граѓани за кратко време повторно направија дива депонија.

„По втор пат спроведовме акција “Цивилизирај се!Не фрлај ѓубре насекаде!” на оваа локација. Апелираме до граѓаните да престанат да фрлаат ѓубре насекаде, бидејќи ако вака продолжиме Гостивар ќе стане депонија. Членовите на Гв Еко работат без никаква парична надомест, волонтерски, секогаш се на терен кога е потребно, но само еднаш до два пати на иста локација. Следниот пат кога ќе се увиди дека пак е насобран смет ќе следи кривична пријава со парична казна или 6 месеци чистење на смет за секој кој ја загадува средината, а фотографии од несовесни граѓани кои фрлаат ѓубре насекаде, јавно ќе ги објавуваме“, изјави Весна Б. Бошкоска, член на Здружението Гв Еко, организатор на акцијата.

Во денешната акција беше собран еден камион ѓубре. Здружението најави дека во понеделник ќе продолжат со чистење на истото место, за да се отстрани и градежниот шут. „За таа намена побаравме специјално возило, багер од „Комуналец“ од каде добивме ветување дека ќе испратат во понеделик“, велат од Гв Еко.