Во болницата во Гостивар лани се родиле 674 бебиња, меѓу нив 4 пара близнаци

Гостивар лани успеал да го задржи наталитетот на стабилно ниво, и за разлика од претходно нема забележително опаѓање на бројката на новороденчиња. Гинеколошко-акушерското одделение во гостиварската општа болница „Ферид Мурад“ ја заокружи минатата година со 674 новородени бебиња.

„Слободно можеме да кажеме дека имавме успешна година, затоа што ја задржавме бројката на раѓања на исто ниво, односно со само десетина бебиња помалку споредено со 2017-та, за разлика од претходно кога сме имале значителни опаѓања.“, оцени раководителот на гинеколошко-акушерското одделние д-р Агим Јакупи.

Иако првото бебе родено во 2018-та беше женско, сепак во текот на годината, мајките повеќе раѓале машки деца, односно од вкупниот број на родени, 345 биле бебиња од машки пол. Во 2018-та, четири родилки во Гостивар на свет донеле близнаци.

Податокот што ги радува лекарите е намалување на бројката на предвремено родени бебиња. Во Гостивар лани ги имало 37, од кои за 17 после раѓањето имало потреба да бидат испратени на клиника во Скопје, кадешто постојат соодветни услови за третман на предвремени новороденчиња.