Во Галичник се одржува јубилејната 30-та Ликовна колонија

Традиционалната Галичка ликовна колонија, годинава одбележува 30 години постоење. Јубилејното издание на оваа значајна визуелна манифестацијата беше отворена на 15 август, а ќе трае до 22 август (четврток).

Во живописниот предел на Галичник, се инспирираат, творат и разменуваат креативна енергија единаесет уметници од земјава и странство: Даниел Дресел од Германија, Симоне Хујманс и Мари ван Воленхофен од Холандија, Селма Џулизаревиќ и Бранимир Карановиќ од Србија, Софија Грегоријаду од Грција, Улф Лундин од Шведска, Лин Куасаи од Англија, Хелидон Ѓерѓи од Албанија и Зорица Зафировска и Атанас Атанасоски од Македонија.

Во рамки на колонијата се организираат јавни презентации на кои уметниците се претставуваат пред локалната јавност, а утре (18 август)  во 11 часот ќе се одржи креативна работилница наменета за најмладите.

Галичката ликовна колонија е основана од галичанецот Нове Франговски (1939-2017), еден од најзначајните претставници на средната генерација ликовни уметници во Македонија.