Во Гостивар до сега 20-тина пријавени за вадење на крстот – се заокружуваат подготовките за Водици

Годинава во Гостивар по четврти пат од возобновувањето на традицијата ќе се организира чествување на големиот христијански празник Богојавление-Водици со положување на светиот крст во Вардар. Иницијативниот одбор изминатите денови се посвети на дефинирање на деталите за текот на одбележувањето што ќе се случува на 19-ти јануари во Гостивар.

По повод празникот, света литургија ќе биде отслужена во соборната црква „Пресвета Богородица” од каде ќе тргне и литијата во 11.30 часот. Чинот на осветувањето и положувањето на светиот крст во водите на Вардар на пладне се очекува да го изврши, Митрополитот тетовско-гостиварски, господин Јосиф.

Иницијативниот одбор за прослава на Водици ги поканува сите христијански верници да бидат дел од манифестацијата, за да придонесат во зачувување на традицијата и повеличенствено одбележување. Потсетуваат дека се уште трае пријавувањето за вадење на крстот од водите на реката Вардар, и ги повикуваат заинтересираните да се пријават на телефонскиот број ‎078 998 554. До сега се пријавени дваесетина млади гостиварци.

Традицијата на одбележување на Богојавление -Водици во Гостивар беше возобновена во 2015-та година, по речиси седум децении пауза. Крстот до сега се најде во рацете на Дарко Лавдинов (2015), Горан Божиновски (2016) и Павел Давидоски (2017).

Според традициите, во неделата пред празникот жените го правеа обичајот со пуштање на врвката со која се врзува крстот.