Во Гостивар до сега 30 болни и немоќни за гласање – пријавувањето до полноќ

Рокот за пријавување за гласање во домашни услови за болни и немоќни лица завршува вечерва на полноќ. Од Општинската изборна комисија на Гостивар известија дека до сега кај нив биле пријавени триесетина такви гласачи и напоменаа дека денес ќе работат со дежурство до истекување на рокот.

Изборниот законик предвидува кој може да гласа како болно или немоќно лице: „Под немоќно или болно лице се подразбира лицето кое не е во можност да ги врши основните животни потреби (не е во можност да се движи во станот ниту со користење на соодветни помагала, да одржува основна лична хигиена, да се облекува, да зема храна, ниту да врши други дејства за задоволување на основните животни потреби), односно лицето е неподвижно, потполно слепо, заболено од дистрофија или сродни мускулни или нервно мускуларни заболувања, церебрална или детска парализа или параплегија“.

Општинската комисија подготвува листи на немоќни или болни лица кои ќе гласаат во своите домови и ги доставува до избирачките одбори. На 14-ти октомври, еден ден пред денот на изборите, како болни и немоќни ќе можат да гласаат само лицата кои се наоѓаат на листите. Гласањето го спроведува Избирачкиот одбор каде лицето е запишано во Избирачкиот список на  адресата која гласачот ја пријавил.