Во Гостивар уапсени 15 лица поради наркотици

Во изминатите два и пол месеци од оваа година Секторот за внатрешни работи Тетово ги интензивираше континуираните активности за справување со „неовластеното производство и пуштање во промет на наркотични дроги, психотропни супстанци и прекурсори“, и со „овозможување употреба на наркотични дроги“.

Во овој период во педесетина случаи евидентирани на тетовските простори лишени од слобода биле 80 лица, додека на гостиварско подрачје 15. На сите нив по расчистување и документирање на случаите изготвени им се соодветни поднесоци. „Кај најголемиот број од нив биле пронајдени и одземени марихуана и кокаин, а во само неколку случаи хероин и амфетамин. Претежно станува збор за млади лица на возраст од 15 до 45 години, кои лично користеле вакви опијати, но се среќаваат и поединци кои им ги продавале на други.“, информира полицискиот портпарол, Марјан Јосифоски.

Секторот за внатрешни работи Тетово најавува дека и во наредниот период  ќе презема контролни и други активности во чие средиште ќе бидат лицата кои поседуваат, користат или продаваат наркотични средства и адекватно ќе ги санкционира со изготвување на законски предвидените поднесоци.