Во Гостивар за 4 месеци пишани скоро 1.400 казни за брзо возење

Во изминатите четири месеци од оваа година на подрачјето на Секторот за внатрешни работи Тетово изречени се вкупно 4146 мерки за неприлагодена брзина, односно за пречекорување на максимално дозволената брзина. Од нив 1.358 на подрачјето на Гостивар, а останатите на тетовското. Најголемиот број од овие мерки се однесувале на пречекорувањата на брзината на автопатот Гостивар – Тетово – Скопје и магистралниот пат Гостивар-Кичево, а дел од мерките и на околните регионални патишта.

На возачите-прекршители во овој период изготвени им се поднесоци и зависно од големината на пречекорувањето ќе се соочат со парични глоби кои за овој вид прекршок се движат од 45 до 400 евра. За оние кои позначително ја пречекориле брзината предвидена е и мерка времено одземање на возачките дозволи од три месеци до една година.

Секторот за внатрешни работи Тетово со уште едно потсетување на возачите да се придржуваат до сообраќајните знаци за ограничување на пропишаната брзина, посебно на автопатот и магистралата Гостивар-Кичево. Ова, дотолку повеќе што и годинава најчеста причина за досега случените сообраќајни несреќи на поширокото полошко подрачје е токму пребрзото возење.