Во локал во Гостивар фатени Албанки и Косоварки кои работеле на црно

Во полициска акција спроведена синоќа, во угостителски објект во Гостивар биле откриени пет странски државјанки без регулиран престој. Три од нив биле од Албанија, а две од Косово. Девојките на возраст од 23 до 38 години, незаконски биле ангажирани во локалот како пејачки и танчерки. Освен нив, полицијата затекнала и две женски лица од Македонија, кои исто така работеле на црно. Акцијата е организирана во насока на откривање евентуална трговија со луѓе и проституција.

Девојките од странство, сопственикот на локалот и уште едно машко лице кое ги навредувало полициските службеници, биле приведени во Полициската станица во Гостивар. Како што информираат од СВР Тетово, по обавениот разговор, сопственикот и машкото лице се пуштени дома, додека странските државјанки се предадени на Одделението за прекуграничен криминал, миграции и странци.