Во земјава потврдени 4 случаи на индиски корона сој, за уште 4 лица се чекаат резултати

Министерот за здравство Венко Филипче денес информираше дека до сега во земјава се регистрирани четири лица заразени со делта (индиски) сој на коронавирус, од кои последниот случај бил потврден вчера. До вечер треба да бидат познати резултатите од анализите на уште 4 заболени лица, дали се работи за делта сој или не.

„Во повеќе од 100 земји е регистриран делта сојот. Кај нас досега имаше потврдени три случаи. Во текот на вчерашниот ден е потврден уште еден. Тоа е пациент кој се лекува во болницата во Велес и има лесна клиничка слика. Чекаме резултати уште за четири лица, тие се лекуваат во Скопје, само еден од нив е во потешка состојба на респираторна машина, остантите се во стабилна состојба. Скринингот кој се прави на тестовите, тоа е оној скрининг којшто се прави на сите тестови од Институтот за јавно здравје и лабараторијата на МАНУ и ја исклучува британската варијанта. Што значи, секаде каде скринингот ќе покаже дека не е британската варијанта, се прави секвенционирање за да се потврди евентуалното присуство на индискиот сој и тоа сега се прави за овие четири случаи. Ќе ги имаме резултатите до вечерва.“, изјави Филипче.

Министерот рече дека пациентите не се поврзани епидемиолошки и не се вакцинирани против коронавирус.