Војче Смилески, заменик командир на ПС ОН Гостивар

Изминатата 2021 година на професионален план пред се ќе ја паметам по многуте предизвици со општествено-безбедносен предзнак, кои претставуваат мои секојдневни работни обврски и кои без да звучам претенциозно, мислам дека ги извршував целосно, ефикасно и успешно и во интерес на сите граѓани подеднакво. На тој двонасочен пат, морам да нагласам во секој миг или повлечен потег имав максимална, безрезервна поддршка од колегите, со кои настапуваме тимски што е според мене најважен предуслов за остварување на посакуваните резултати. Приватно, семејно бев исполнет со повеќе задоволства, мали, а сепак големи во чие средиште беа оние кои најмногу ми значат, сопругата Билјана и синовите Андреј и Лука, моето највредно богатство, кое секогаш и секаде се со мене и зад мене, исполнети со љубов и топлина, што во сегашниве времиња ни е прекупотребна, за што јавно им благодарам.

Во новата 2022 година, се надевам на подобри времиња за сите. Да се вратат изгубените човечки вредности, духовниот мир и спокојство меѓу луѓето и напредокот кого неизмерно на јаве го сонуваме и кон кого искрено тежнееме.

Среќна Нова година!.